د روسیې اطلاعاتي خبري اژانس د ۲۰۲۰م کال د جون پر ۱۷ مه د روسيې د بهرنیو چارو د وزیر سرګي لاوروف له قوله خبر ورکړی چې مسکو د واشنګټن له کړنو په ليبیا کې د اوربند لپاره هرکلی کوي.

روسيې د ليبیا په مسله کې خپله بې وسي درک کړې ده. په همدې دلیل يې د دغه کړکېچ په حل کې د امريکا ونډه په رسمیت پېژندلې او اغېز يې خورا مهم بللی دی.

امریکا تر اوسه د (الوفاق) له دولت څخه ملاټر نه دی اعلام کړی او ادعا لري چې جنرال حفتر د سخت دريځو ځواکونو له بریدونو سره مخالف دی؛ خو موندنې ښيې چې د امريکا دولت د جنرال حفتر له ځواکونو سره اړیکه لري او له ترهګرۍ سره د مبارزې په پلمه او د ليبیا د تيلو د لاسته راوړلو په موخه له دغې ډلې ملاټر کوي.

تېر کال هم د امريکا ولسشمر ډونالډ ټرمپ له جنرال حفتر سره په خبرو کې دغې موضوع ته اشاره کړې وه.

امریکا د مصر، سعودي عربستان او روسیې له لارې په لیبیا کې له اعلان شوي اوربند څخه خپل ملاتړ څرګند کړی دی.

امریکایي چارواکي له حفتر سره د ټلیفوني اړیکې او هغه لیدنه چې له نوموړي سره یې په مسکو کې درلوده، هغه یې له امریکا څخه مرستې غوښتلو ته اړ کړ.

د امريکا او جنرال حفتر د پراخو اړيکو په دلیل؛ روسیه اوس ځان په ګواښ کې ويني او د لیبيا د موضوع په اړه ځان بېوسه ګڼي. په همدغه دلیل روسیه له امریکا غواړي چې په دې مسله کې لاسووهنه وکړي.

دا په دې مانا ده چې روسیه یوازې د ليبیا مسله نه شي حل کولای او فکر کوي چې امريکا يې د حل وړتیا لري.  له شک پرته دا کړنه به د روسيې نفوذ په نړيواله کچه را ټيټ کړي.

ژباړن: الهام پردېس